ZPM EOB tur VUC-in an ruat dawn

ZPM Gen Hqrs executive committee nimina Vanapa Hall-a ṭhukhawm chuan, an party elected office bearer (EOB) thar turte chu thlang loin, Val Upa Council (VUC) ruat turin an rel.

ZPM EOB ni lai mekte term hi February 2027-ah a tawp dawn a, ruahmanna hmasaah chuan September 29, 2026 ah R Dengṭhuama Hall-a general assembly an neih hunah hruaitu thar thlan tur a ni.

ZPM president charge la mektu VL Zaithan­zama, MLA chuan an President leh Sr Vice President-te'n an term hmang zo se an duh a, an hriselna dinhmunin a zir loh avangin a hun hmaa inthlan an rel thu Vanglaini a lo hrilh tawh a ni.

ZPM thuchhuah tarlan danin, ZPM executive committee nimina ṭhukhawm chuan, EOB term a tawp dawn tak avangin hruaitu thar turte chu a ruata ruat nise, tiin lungrual takin an pawm.

Term thara ZPM Gen Hqrs EOB tur ruattu tur atana Val Upa Council (VUC) te kuta dah rawtna chu an pawm a, EOB thar ruat turin VUC-in phungbawm sawm se tih pawh lungrual takin an pawm.

ZPM inthlan hnun­hnung berah president, vice president leh treasurer thlan an ni a, a hnuah vice president atana thlan chu sr vice president-ah dah niin, vice president pathum ruat belh an ni.

Term tharah chuan president, sr vice president, vice president leh treasurer pakhat ṭheuh awm turin ZPM chuan thutlukna an lo siam tawh a, vice president dang ruat belh a rem tawh dawn lo.