Bana Kaih Scheme-ah mi 483-in loan cheng nuai 4,377 la tawh

Mizoram sorkar flagship programme Bana Kaih (Handholding) Scheme hnuaiah loan la tura thlan progress partner 742 zinga 483 hnenah loan cheng nuai 4,377 pek a ni tawh a; loan la tawh zinga 146 hi cheng nuai 10-50 inkar la an ni.

Assembly session neih mekah August 25, Thawhlehni khan chief minister Lalduhoma, Planning & Programme Implementation department enkawltu chuan MNF member K Laldawngliana zawhna ziaka chhangin, "Handholding Scheme hnuaiah loan la thei turin tun thlengin progress partner 742 thlan chhuah an ni tawh," a ti a; progress partner thlan chhuah tawh aṭang hian mi 483-in loan an lak tawh thu a tarlang.

Chief Minister-in loan la tawh zat (list) a tarlan danin, Bana Kaih Scheme hnuaiah hian mi 483-in loan

Rs 43,77,94,450 an la tawh a; loan la tawh zingah hian cheng nuai 10-50 inkar loan la 146 awmin, loan la tawh zawng zawng aṭangin 30.23% an ni. Mi 337-in loan hi cheng nuai 10 aia tlem an la a, 69.77% an ni.

Bana Kaih hnuaia loan la zingah hian cheng nuai 50 la mi pathum awmin, cheng nuai 40-50 inkar la mi 14, cheng nuai 30-40 inkar la mi 19, cheng nuai 20-30 inkar la mi 26, cheng nuai 10-20 inkar la mi 84, cheng nuai 1-10 inkar la mi 330 leh Rs 1,00,000 hnuai lam la mi pasarih an awm tawh bawk.