KHAWTHLIR

Thisen pe

Nimin khan PYD (Mizoram) Chawlhhmun Bial chuan Synod Hospital tan thisen unit 54 an pe a, petute mipa 42 leh hmeichhia 12 an ni a; Shillong Group YMA leh Mizo Students’ Union, Shillong te pawhin nimin khan NEIGRIHMS-ah thisen an pe. Mizoram Law College NSS chuan August 25, Thawhlehni khan Civil Hospital, Aizawl tan thisen unit 50 an pe a, petute mipa 32 leh hmeichhia 18 an ni.

HIV/AIDS zirho

Young Women’s Christian Association (YWCA), Aizawl leh General PYD-a Social Wing Committee chuan nimin khan Hnamro Hall, Dawrpuiah 'Faith Based Organizations Response to HIV/AIDS in Mizoram' tih chungchang zirhona an buatsaih. YWCA Aizawl president Dr A Lalchhandami'n HIV/AIDS laka fimkhur dan tur a sawi a, Lalmuan Puii, YWCA kaihhruaiin 'Kohhranin engtin nge HIV/AIDS dona kawngah hma kan lak ang?' tih thupui sawiho a ni.

Khaw 6-ah SWMR kalpui ṭan tawh

Serchhip district bawrhsap Paul L Khuma kaihhruaiin August 25, Thawhlehni khan sorkar hotute leh bawlhhlawh sawngbawltu Green Herd SP ten bawlhhlawh sawngbawl kawnga hmalakna leh hmachhawpte an thlirho a; New Serchhip North leh South Area bakah Sialsir, Sailulak, Leng leh Baktawng Chhuantharahte Solid Waste Management Rules, 2026 angin bawlhhlawh chi li-a thliar hran kalpui a nih tawh thu tarlan a ni.

Tui enkawl dan tur rel

Lunglei District Water & Sanitation Mission chu an chairman Navneet Mann, district bawrhsap kaihhruaiin August 25, Thawhlehni khan an ṭhukhawm a; thingtlang khaw hrang hranga tui pekna (rural drinking water system)-te ṭha taka enkawl zui dan tur te, khawtlang mi khawl enkawl dan thiam bik leh tuipu turte chungchanga inkaihhruaina fel tak ruahman te, hnatlang leh sorkar scheme dang nena thawkhoa hmalak dan tur leh khawl enkawl leh tui lakna chhia siamṭhat dan inzirtirna buatsaihte an rel.