Chittagong Hill Tracts leh Tlabung Chakma ram/khua bil a ni ngai lo - YMA Sub-Hqrs, Lunglei

YMA Sub-Hqrs, Lunglei chuan thuchhuah siamin, Chittagong Hill Tracts chu Chakma ram bil a nih ngai loh thu leh Tlabung pawh Chakma khua a nih ngai loh thu an tarlang.

YMA Sub-Hqrs, Lunglei chuan, kum 1947-a India leh East Pakistan (tuna Bangladesh) inṭhen laia East Pakistan-a Chittagong Hill Tracts beh tir chu thil tih sual lian tak a nih thu an tarlang a, "India ram chhungah rin luh leh ni rawh se tiin Chakma hruaitu ṭhenkhatten Central sorkarah an thlen, tih thu a awm lai a, Ex-Minister, West Tuipui bial MLA hlui chuan Tlabung chu Chittagong Hill Tracts-a bet ṭhin a nih thu a sawi tih kan hria a; kan pi leh pu te chhana kan ram hi tute mahin min hnehchhuh leh min nek zim sak hi kan phal lo a, engtik lai mahin kan remti ngai dawn bawk lo," an ti.

Chittagong Hill Tracts-ah hian Zofate an cheng hmasa ber tih tarlangin YMA Sub-Hqrs, Lunglei chuan, "Ram leh lui tam tak pawh Mizo hming vuah ṭhin a ni a, Zofate zinga Chittagong Hill Tracts luah hnuhnung ber chu Thangluah, Rivung leh Zadeng hnam an ni a, anni hi kum 1750 velah an lut thla. AD 1862 Chittagong bial Annual Report, Superintendent ziahah chuan Kuki (Mizo) 25,980 vel an awm tawh. (Source; A Statistical Account of Bengal Vol. 6. 1876)," an ti a; Mizo lal Rothangpuia Thangluah khan Mizoram chhim tawp thlengin a luah a, a ram chin chuan Lungsen leh Sirte tlangdung a huam vek a, Tlabung pawh a lalna ramchhung vek a nih thu an tarlang.

YMA Sub-Hqrs, Lunglei chuan Chittagong Hill Tracts hi Chakma-te ram bil a ni ngai lo a, Zofaten an luah hmasa ber tih tarlangin, "Tlabung pawh hi hmanlai aṭanga vawiin thlengin Chakma khua a ni ngai lo a, Zofate khawpui pawimawh a ni reng a ni," an ti bawk.