Tun thla chhunga kawng siamṭha turin Mizoram sorkar leh Nidhi an ngen

Mizoram Tipper Association (Drivers & Owners) Joint Committee chuan thuchhuah siamin, Mamit district-a NH-6/108/BZ Road chu chak taka thawmṭhat hna thawk turin Mizoram sorkar leh Nidhi Creative Infrastructure Private Limited an phût a; fur lai a nih avangin blacktop theih a ni lo tih an hriat thu an tarlan rualin, kawng khuar leh nâl laite siamṭha thuai turin an ngen.

MTP (Drivers & Owners) Joint Committee chuan, August 25, Thawhlehni khan Mamit district-a NH-6/108/BZ Road an tlawh thu an tarlang a, "Kan ram kawngpui pawimawh tak takte kum tam tak chhung kan hotute hnenah kan lo thlen tawh ṭhin a, DC level meuh pawhin vawiduai lo kan lo sawiho tawh ṭhin. Hmun ṭhenkhatah chuan hmasawnna kan hmuh laiin Mamit district-ah harsatna namen lo kan tawk chho leh ṭan," an ti.

NH-6/108/BZ Road chu Mizoramin a mamawh balu ṭha zawk phurh luhna kawngpui a nih thu tarlangin tripper pawl hruaitute chuan, "Helai kawng hi chak taka thawmṭhat hna thawk turin Mizoram sorkar leh Nidhi Creative Infrastructure Private Limited kan phût tak meuh meuh a, tun thla chhung hian kan duh anga tlan nuam tawk taka an siam lo a nih chuan kan thiam dan leh kan remhriat dan ang angin hma kan la dawn," an ti a; fur lai a nih avangin blacktop theih a ni lo tih an hriat thu an tarlan rualin, lung chang ṭha hmanga kawng khuar laite hnawh a, kawng nâl laite siamṭha thuai turin an ngen nghal bawk.