Lirthei intlân chhâwk dan tidanglam
Traffic SP Rodingliana Chawngthu chuan nimin khan hriattirna (notification) tichhuakin, Aizawl Municipal Corporation (AMC) huam chhunga lirthei intlân chhâwk tihdanglam a nih thu a puang.
Notification-a a lan danin, lirthei intlàn chhâwk hi registration number tàwp ber anga kalpui a ni dawn a, zing dar 9 aṭanga tlai dar 4:30 thleng a huam ang. District dang lirthei te, state páwn lama lirthei register te, mimal lirthei leh bungraw phur lirthei Aizawla awm leh lut zawng zawng a huam. Inrinni, Pathianni leh sorkar chawlh (holiday)-ah erawh chuan intlàn chhâwk hi kalpui a ni dawn lo.
Hriat lâwk loh rîkrum (emergency) thil leh ṭul bikah chuan Traffic SP pisa, Treasury Square-ah leh Aizawl Traffic Control Room phone number 0389-2322307/ 2313061/ 9366553559-ahte lirthei tlân phalna dil theih a ni.
Taxi-te chu an kalpui mek angin sticker A, B leh C belte zing dar 9 aṭanga tlai dar 6:30 inkarah an intlàn chhâwk dawn a, Inrinniah chuan chawhnu dar 1 aṭangin an vaia tlàn phalsak an ni. Pathianni leh sorkar chawlhah an vaia tlân phal a ni bawk.
Two wheeler taxi chu sticker A, B, C, D leh E hmanga an tlàn dan tur kalpui mek angin zing dar 9 aṭanga tlai dar 6:30 inkarah an intlàn chhâwk dawn a; Inrinni bikah chawhnu dar 1 aṭangin tlang dung kawngpui (main spine/artery)-ah an vaia tlàn phal niin, Pathianni leh sorkar chawlh ní-ah an vaia tlân phal a ni ang.
Intlàn chhâwkin a huam lohte
1. Governor, Chief Minister leh Speaker-te (an carcade tiamin)
2. Gauhati High Court judge
3. Public service vehicle (passenger phur lirthei) city bus/ bus, maxicab (state dang register huamin), auto rickshaw, institution bus, department bus
4. Police department motor duty, traffic police duty, Fire (FES) motor, Excise & Narcotics motor duty, medical & hospital emergency duty, ambulance/morgue van, executive magistrate law and order duty leh emergency duty, Disaster Management hnuaia emergency duty, media mi (MJA sticker bel), PHE emergency duty leh PHE tui sem, P&E emergency duty, bawnghnute sem, chanchinbu sem, AMC hnuaia bawlhhlawh paih motor duty, army leh para-military force, office despatch rider
5. Rualbanlote tana special vehicle
6. District dang aṭanga sorkar thil pawimawha duty, law & order leh essential commodity duty-te chu Aizawl traffic police an hrilh hmasak hnuah an lirthei tlan dan tur ruahman a ni ang.
7. HMV/MMV leh a chung lamte: Sairang aṭanga Zemabawk (NH-54) lama tlân tlang turte chu zing dar 7 aṭanga chawhnu dar 1 inkarah an tlân thei ang. Zemabawk lam aṭanga Sairang lama tlân tlang turte chu chawhnu dar 1:30 aṭanga a tûk zing dar 7 inkarah an tlân tlang thei ang.