Seal lem hmanga periodic patta Díl nia hriatte lakah FIR thehlut

Bilkhawthlir Joint VC chuan an huam chhungah seal lem hmanga periodic patte dil an awma an hriat avangin Bilkhawthlir Police Station-ah January 16, Inrinni khan FIR an thehlut.

Periodic patta diltu ṭhenkhat chuan seal lem an hman bakah, perio­dic patta pek phal lohna notified town huam chhung­ah an dil nia hriat a ni.

Bilkhawthlir Joint VC hruaitute hnen aṭanga Vanglaini thu dawn danin, tun hnai khan mi 16-in Bilkhawthlir VC huam chhungah periodic patta dilna Kolasib-a Settlement Office-ah an thehlut a ni. An dilna chu typewriter hmanga chhut a ni a, kum 1982-ah VC pass an neih thu tarlangin, an seal hman erawh chu tunlaia hman ṭhin self ink a ni thung. Seal chu Bilkhawthlir VC president hlui F Tlang­khuma hming a ni. 

F Tlangkhuma hi a hmingin seal siam a nih thu Joint VC chuan an hrilh a; F Tlangkhuma chuan seal chu a siam a nih loh thu sawiin, hma la turin Joint VC a ngen nghal. Periodic patta diltute chu Aizawl mi 13, Lunglei, Serchhip leh Tachhip khaw mi pakhat ṭheuh an ni.

Bilkhawthlir Joint VC hruaitute chuan, periodic patta diltute'n seal lem an hmang ngei tih an chian thu sawiin, "Kum 1982-ah thinga siam bâk seal a la awm lo hrim hrim. Pu F Tlangkuma pawhin an siam chawp a ni tih a chiang a, a hming sign pawh ama ziah a ni lo tih a chiang," an ti. 

Periodic patte diltute chuan ram an neih pawh an rin loh thu leh NH-306 four lane tura ruahman mek a nih avangin zangna­dawmna an beisei vanga dil an nih an rin thu Vanglaini an hrilh bawk.

Hetih lai hian, periodic patta dilna hi Kolasib Settle­ment Office chuan thu an hmuh avangin an hnâwl ngam lo a, enfiah turin sur­veyor pawh an tír a ni. Surveyor kal ṭum hian perio­dic patta diltute an kal lo.