House-a chhan tur chi zawhna pakhat social media-ah a darh

Nimina Assembly session-ah Assembly speaker Lalbiakzama chuan, Assembly House-a ṭawngkaa chhàn tur zawhna (starred question) pakhat chu social media-ah a darh hmasak thu a sawi a; a zâwttu nen an inbiak hnuah ziaka chhan tur (unstarred question)-ah leh a nih thu House a hrilh.

Assembly Speaker chuan, starred question 22-na chu a hun hma leh a tihdarhtu tur (authority) ni loin social media-a chhiar theih tura a dah thu a sawi a, "Chuvangin, ziaka chhàn tura dah a ni. Session-a zawhna hi session-a zawh a ni a, a concern minister-in a chhan hma chuan khawiah mah páwn lama tihchhuah thiang a ni lo. Chhiar theih emaw, hmuh theihin a awm tur a ni lo," a ti.

Zawhna sût (cancel) lo a, unstarred question-a dah a nih chhan sawiin Lal­biak­zama chuan, "A zawt­­tuin a hriat duh a hriat kha a right a nih bawk si avangin starred ques­tion aṭangin unstarred ques­tion-ah leh a ni. A zawttu nen inbiain kan sawi dun," a ti a; zâwttu nen an inbiak hnuah tih dan tur rua­hman a nih thu a sawi.

Vanglaini palai zawhna chhangin Assembly Speaker chuan, MLA pakhatin a personal assistant (PA) hnenah an zawhna a chhuah thu a hrilh tih a sawi a, "A PA hian whatsapp status-ah a lo hmang a ni. Thil awm dan kan thlirin, sual vang ngawr ngawra tih a ni lo niin kan hria; chuvangin, hremna lek loin, hetiang hian ruahmanna kan siam ta mai a ni," a ti.