KHAWTHLIR

MCC-in thisen pe

Mizoram Christian College NSS unit chuan nimin khan an hmunah thisen pek rûnpui an huaihawt a; Civil Hospital, Aizawl tan thisen unit 110 an pe a, petute mipa 95 leh hmeichhia 15 an ni.

Huanah thiin hmu

Sangkunga Pautu (64) h/o R Zothankhumi, Tanhril chu August 26, Nilaini tlai dar 5 vel khan an huanah thia hmuh a ni. Thu dawn danin, Sangkunga Pautu hi Nilaini khan MZU bula an huanah hlo kâp turin a kal. A haw har deuh avang leh a nupui phone call a lak loh avangin ngaihven turin a fate an kal a; a fate chuan thiin an zuk hmu a, a lo khawng tawh. Amah hi thisen sang leh zunthlum nei a ni a, a chhungte ngen angin a ruang endik (PME) a ni lo.

Phone bo hmuhte a neitute pe let

Serchhip Police chuan tun hnaia mobile phone bo an chhui chhuah paruk chu nimin khan a neitute hnenah an pe let. Serchhip Police Station officer in-charge John Malsawmtluanga chuan, CEIR Portal hman a nih hnuah phone bo chhui chhuah zung zung theih a nih tawh thu a sawi a; thil bo a awm chuan Police hnena hriattir zung zung ṭhin tur leh FIR thehluh/ziah kawngah mamawhtute ṭanpui tura an inhawn reng thu a sawi bawk.

Session chhim

Sihphir High School chuan nimin khan Social Science subject-a 'Indian Government & Politics' kaihhnawihah excursion an nei a, Legislative Assembly session an chhim. Governor chenna Lok Bhavan leh Aijal Club an tlawh bawk.

Heroin man

Champhai Police Special Task Force chuan August 26, Nilaini khan Mualkawi khaw dáiah TATA 207 truck MZ-01 S-2367 aṭangin heroin gram 197 an man. Lirthei khalhtu Zodingliana (38), Khawzawl Hermon Veng leh a thurualpui Leilet, Myanmar mi pahnih - Lalchhanhima (19) leh Lalramthanga (29), Zokhawthara khawsa mekte an man nghal bawk.

VB-GRAMG inzirtir

State Institute of Rural Development & Panchayati Raj chuan nimin khan Khawzawl DRDO conference hall-ah DRDO, DCIO, PMKSY leh MGNREGA hnuaia thawkte tan VB-GRAMG chungchang inhrilhfiahna, ‘Orientation Course on VB-GRAMG functionaries’ an buatsaih. He hun hi Khawzawl bawrhsap K Vanlalṭhiana'n a hmanpui a; vawiinah chhunzawma zawh a ni ang.