Mizo sipaiin Sena Medal a dawng

Mizoram sipai Assam Regiment Sub. K Laldingliana, Champhai Kahrawt, 42 Rastriya Rifles-a awm mek chu January 16, Inrinni khan New Delhi-ah sipai huaisen chawimawina Sena Medal hlan a ni.

December 12, 1980-a piang K Laldingliana hi kum 2017-2020 chhungin 22 Rastriya Rifles (RR)-ah a awm a, tunah chuan 9 Assam Regiment-ah a awm mek. RR-a a awm lai, October 22, 2019 khan J&K-a Rajpora Operation-ah telin, mi firfiakte nen an inbei a, mi firfiakte chu an chimih vek a ni.

Mi firfiakte nen an inbeihnaah an chêt ṭhat avangin Sub. K Laldingliana hi Sena Medal pek a ni a, Inrinni khan Chief of Army Staff Gen. MM Navarane chuan New Delhi-ah a hlân a ni.

K Laldingliana s/o K Khuangzika (L) hi football khel ṭhin a ni a, Mizoram aiawhin ṭum eng emaw zat khel tawhin, captain pawh a ni tawh a, Meghalaya leh India ram aiawh pawhin a khêl tawh ṭhin.

 Aizawlah MFA first division club Kulikawn FC, Venghlui FC leh Dawrpui Vengthar FC tan a khel tawh a, Assam Regiment-a a luh hnuah Assam Regiment Centre (ARC) football team tan a khel ṭhin a; kum 2010 khan Shillong Lajong tan a khel tawh bawk.