Fûr ruahtui a reh veleh kawng thlan bik 19 siam a ni dawn - PWD Minister

Public Works depatrment minister Vanlalhlana chuan nimin khan Assembly session-ah, fûr ruahtui tam a reh veleh kawng thlan bik 19 siam a nih dawn thu a sawi.

INC member C Ngunlianchunga zawhna chhangin PWD Minister chuan, kawng chhia chu department-in a hriat thu a sawi a, "Kawng thlan bik 19 kan nei a, fûr ruahtui tam a reh veleh siam ṭan a ni ang," a ti.

Vanlalhlana chuan, district khawpui kawng a chhia tih an hriat thu sawiin, "State capital-ah bul kan ṭan a, Aizawl khawpui kawng ṭhate hi in rawn sawi chhuah ka ring a nia," a ti a, district khawpui kawng an hmabak thu a sawi.

PWD Minister sawi danin, tuialhthei (petrol leh diesel) cess aṭangin Mizoram sorkarin PWD hnuaiah kawng siamna atan cheng vbc 43.25 a ruahman a ni.

MNF member K Lalsawngliana zawhna chhangin Vanlalhlana chuan, PTC leh Sakawrtuichhun inkar kawng PCC-a siam, departmental work thawh hna chu zawh a nih tawh thu House a hrilh.

PWD Minister chuan, PTC - Sakawrtuichhun siam chu Mizoram State Project Monitoring Committee-in an endik a, sample test tur an lak result a chhuah tawh thu sawiin, "Sample test ṭhenkhat result aṭangin concrete quality ṭha tawk lo hmuh chhuah a ni," a ti.

Kawng siam ṭha tâwk lo laite chu a theih chin chinah siamṭhattir a nih thu sawiin Vanlalhlana chuan, "Heng hna ṭha tâwk lote hi siamṭhat a ni," a ti a; departmental work a nih angin hremna a awm loh thu a sawi.