Minister-in Hunthar lei tlahniam a tlawh

Urban Development & Poverty Alleviatoin minister K Sapdanga chuan August 26, Nilaini khan a bial Aizawl North-III chhunga Hunthar Venga lei tlahniam a tlawh a; Hunthar Venga lei che ṭhin chu a la tawp lo nia a lan thu a sawi.

K Sapdanga chuan, lei tlakhniamna hmun chu Aizawl châk lakna kawngpui pawimawh a nih thu a sawi a, "Sorkar awm tawh apiangin an theih ang tâwkin hma an la ṭhin a, sum pawh tam tak he laiah hian a luang ral tawh. Fûr ruahtui a lo tlak hian he lai hmun hi a che leh ṭhin a, tunah pawh lei chê hi a la châwl chuang lo niin a lang," a ti.

Hunthar Venga lei chêtna hmun chu Aizawla kawng pawimawh ber a nih vang leh a chhehvela chengte tan thlabâr taka awm reng a la ngaih avangin ngaihthah theih a nih loh tih thu Minister chuan a sawi a; hmalak chhunzawm dan tur a hmuna enfiah ṭha an tih avangin sorkar official-te nen an en tih a sawi a ni.

UDPA Minister chuan, an hmuh dan leh ngaihdan zûlzuiin ruahmanna siam tur a nih thu a sawi a, "Sum pawh a ṭul anga dap chhoh a ngai dawn a, vawiina kan thlirhona hian rah ṭha chhuah ngei turin a theih ang angin bawhzui chhoh kan tum dawn a ni," a ti.

Minister hi Aizawl mayor H Lalremtluanga, UDPA Director, PWD Chief Engineer, AMC Commissioner, Hunthar Veng Local Council leh sorkar official dangte'n an ṭawiawm a; PWD leh AMC hotute'n an hmuh dante an sawi a, Hunthar LC-in lei chet dan an tawnhriatte an sawi bawk.