Thing bo ṭhin titawp turin sorkar phût

Centre for Environment & Social Justice (CESJ) chuan thuchhuah siamin, Mizorama thing phunte sorkarin a ven him ṭhat loh avangin a bo ṭhin niin an tarlang a; thing phun bo ṭhin chu tihtawp a nih theih nan hma la turin sorkar an phût.

CESJ chuan, district council hun lai aṭangin Mizoramah thing hralh kal chi (commercial tree species) phun a ni ṭhin tih sawiin, "Tlem lai deuh aṭang khan Mizoram hmun hrang hranga sorkar (Forest department) thing phun puitling tawh tam tak chu dan kalhin a rûk a rála kih leh rûkbo a ni ṭhin," an ti a; reserved forest-a mi pawh mimal kuta awm ta, Revenue department-in mimal hnena land pass an pekte a tam thu an tarlang.

Kum li/nga vel kal ta aṭang khan Kawrthah leh Mamit Forest Division chhunga sorkar thing phun puitling tawh, a bikin teak a bo nasat thu sawiin CESJ chuan, "Teak thing rûk khawmte hi transit pass tel loa phurh sawn theih a nih loh avangin private felling permit neitute thing kara zep ruin, a ṭhen state pawnah phurh chhuah a ni a, a ṭhente chu mimal saw mill-ah hralh a ni ṭhin," an ti a; thing phun ru ṭhinte zawng chhuak a, dan anga hma la tura sorkar an phût.

CESJ chuan, thing phunte a him leh him loh emaw, a bo leh bo lohte Forest field staff-te'n a hmunah kala an thlithlai a, hotute hnenah hunbi neia report an pek theih nan hma la turin sorkar an phut a; saw mill license neite'n thing an lei zat, zai chhuah zat, thawn chhuah zat leh an la kawl zatte Saw Mill Rules-in a phût anga endik turin an phût bawk.

THING (TEAK) BO CHHAN AN TARLANTE

✓ Timber mafia-te'n thawktu ṭhenkhatte an thurualpui emaw, an ká an hup a ni thei.

✓ Bialtu DFO, RO leh field staff-te hian sorkar teak plantation venhim hi ngaih pawimawh berah an nei lo niin a lang.

✓ Thing rutute zingah Vai, Bru leh local mi, drugs addict-te pawh an tel. An in organize ṭha em em a, mimal teak pawh an zuah lo. Zan dar 7-11 inkarah te, zing dar 3-8 inkarah te an ru tlangpui.

✓ Private teak felling permit neite’n an thing kihte hi felling guidelines-in a phût anga endik leh an phurh chhuah thlenga vil zui a ni ngai lo.

✓ Saw mill license neite thing lei zat, zai chhuah zat, thawn chhuah zat leh an la kawl zat te hi Saw Mill Rules-in a phût anga endik leh chhiar a ni lo.