Serchhipah leivûng paihna tur pawm

Serchhip district bawrhsap Paul L Khuma hoin nimin khan Serchhipa leivûng paihna hmunpui thar atana hmun pathum thlante chungchang thlirho a ni a; leivûng paihna atan hmun pahnih an pawm.

Leivung paihna atana hman, Serchhip By-pass Road lei (bridge) bula mi chu environment tan a him lo tih hriat a nih avanga a thlakna zawn a ni. Survey team-in hmun pathum an thlante chu nimin khan thlirho a ni a; hmun pahnih - Khawtetlang thlanga New Serchhip North VC area chhunga mi leh Chhimveng VC huam chhunga Hrangnawna ram chu leivûng paihna atan an pawm a ni.

Bawrhsap chuan, Serchhip mipui tan leh chhuan thar awm zel turte tan leivûng paihna (spoil bank) mumal tak hmun eng emaw zatah neih a ṭul thu a sawi a; hmun remchang ṭha zawk hriate chu thunei-tute hnenah hriattir zel turin a chah.