HIV/AIDS kaihhnawih thubuai rêl

Ombudsman, Aizawl District Legal Service Authority (ADLSA) leh Mizoram State AIDS Control Society (MSACS) hotute chu nimin khan MSACS Project Director pisaah an ṭhukhawm a; HIV/AIDS (Prevention & Control) Act, 2017 hnuaia thubuai lut chungchang an ngaihtuah.

Ṭhutkhawmah hian Ombudsman Lalnunmawii Ralte, Health department additional secretary ni bawk te, MSACS project director Dr Jane Rinsangi Ralte leh, ADLSA aiawhte an tel a; HIV/AIDS Act hnuaia thubuai lut zinga pasarih chinfel dan tur ngaihtuah a ni. A hmain thubuai paruk chinfel a ni tawh.

HIV/AIDS (Prevention & Control) Act, 2017 hi HIV veite dikna chanvo humhalhna leh venhimna dan a ni a; HIV veite chu an phalna tel lo chuan an dinhmun sawi chhuah khap a ni. HIV veite chu enhran, hmuhsit leh endawng phal a ni lo.