KHAWTHLIR

Aizawl district Magistrate chuan AMC huam chhungah phalna nei loa vantlang hmuna mi panga aia tam awm khawm khapna thupek chu January 16, Inrinni khan a hlîp. Aizawl khawpuia zan dar 8 aṭanga zing dar 4:30 thleng páwn chhuah khapna thupek (curfew) chu thlahdul a ni a, zan dar 8:30 aṭanga zing dar 4:30 inkarah phalna nei loa pawna chhuah khap a ni.

Deputy chief minister Tawnluia chuan Inrinni zing khan Zarkawt a tlawh a, an veng tlâk lama kawng sial dan tur a enfiah. Tawnluia chuan, kawng chu January 20, 2021-ah engineer-te'n enfiahin, hna thawh dan tur ruahmanna an siam zui tur thu a sawi. Zarkawt veng tlâk lam Valley Road chu khâm pang pêra awm a nih avangin kawng sial dan tur pangngaia tih theih a ni lo.

Germ Shield siam chhuah natna hrik thahna disinfectant spray hmangin January 16, Inrinni khan Covid-19 laka invên nan Information and Public Relations department pisa phuh fai a ni a, nimin khan Aizawl Traffic Police Station phuh fai a ni bawk. 

Lok Sabha MP C Lalrosanga chuan Inrinni khan India leh Myanmar insumdawntawnna tura ruahman Saisihchhuah a tlawh a, ram pahnih inrina-a lei dawh tur a hmunah a en a, chak taka helai inkalpawhna tihhlawhtlin a nih theih nana ruahmanna hrang hrang awmte a enfiah. Lok Sabha MP hian amah lo dawngsawngtu Myanmar lam mite chu an hmalak dan a sawipui. 

State Referral Hospital-ah nimin khan Covid-19 vei mi pahnih dah luh a ni a, anni nen hripui vei vangin SRH-ah mi 11 enkawl mek an ni. SRH-ZMC Bulletin tarlan danin, mi 11-te chu Isolation ward-ah enkawl niin, ICU-a enkawl ngai an awm lo a, mi pahnih chu oxygen pek mek an ni thung. Mi 11 zingah hian kum 60 chung lam leh naupang kum 14 hnuai lam an awm lo.