AMC-ah sorkarna kan siam ngei ang - MNF President

MNF president Zoramthanga, chief minister ni bawk chuan Aizawl Municipal Corporation (AMC) inthlan turah MNF party-in sorkarna an siam ngei tur thu a sawi.

January 16, Inrinnia AMC inthlan atana Ward XIV-a campaign hawnna inkhawmah thu sawiin Zoramthanga chuan, "MP, local council leh village council, Lai District Council inthlanah kan chak a, inthlan kal chhoah Pathianin mal min sàwm nasa hle. AMC inthlanah pawh Pathianin mal min sàwm leh ngei ka ring. State-a nghet taka sorkar, term chanve pawh la hmang lo, khawvàr hnua inthlang tur kan ni. Kan ṭha bik kan ti lo, Pathian malsawmna kan dawng rih a, sorkarna siam thei turin kan tling ngei ang," a ti. 

MNF President chuan, rinawm leh dik taka campaign turin MNF mite a chah a,  "MNF party hian hun harsa tak tak kan tâwk ṭhin a, chuti chung chuan Pathianin diamond jubilee lawm theiin min hruai. He ram hi Lalpa tana buatsaih a, a rawngbawl turte chher chhuak turin 'Pathian leh kan ram tan' kan tih tlatna hi kan felna leh kan tlinnaah Pathianin min ruatsak a ni," a ti a, an party chu hun harsaah pawh Pathianin a hruai zel thu a sawi.

MLA aṭanga Lalduhoma bàn a nih chungchangah Zoramthanga chuan, "Speaker-in Pu Duha a disqualify hi an huat vang an ti a. Huat vanga inbàntir ngawt theih a ni lo. Dan a bawhchhiat vang a ni zawk. Pu Duha sawi ang ngeiin, Anti Defection Law hi amah Pu Duha tela Parliament-ah pass a ni. Amah a àwk hmasa ber thung. Pu Duha kha a inthên kual a inthên kual a, 1987-ah Congress MP ding lai ni siin MNU ticket-in Champhai bialah a ding a, Congress-in an dawh rei viau hnuah an disqualify ta a, an huat vang hrim hrim a ni lo," a ti.

MNF President chuan, Lalduhoma bàntir a nih dawnin independent MLA a nih tu mahin an hre tawh lo nia sawiin, "Intihchhiat hi a ṭha lo ve, tiin rei tak kan en. A duh duhin a tâl a, ZPM ber ang ziazángin a awm a, ZPM President awm lai ngei pawhin ZPM office-ah mi thar a lawm lut a, a ni ta em em loin kan naute'n an hria a ni. 'Min bàn chuan Court-ah ka kal ang,' a ti a, a kal leh ta chuang bawk si lo," a ti a, thil reng rengah takna a awm tur a nih thu a sawi.