Smart City a tawp dawn tâk avangin a thlaktu tur kan din - UDPA Minister

UDPA minister K Sapdanga chuan nimin tlai khan Aizawl Smart City Ltd hnuaia cheng vbc 14.33 sênga sak Aizawl DIET huam chhunga Chaltlang Multipurpose Sports Complex a hawng. Minister chuan, Aizawl Smart City Ltd chu a tawp dawn tâk avangin a thlaktu tur Mizoram Urban Development Agency din a nih thu a sawi.

UDPA Minister chuan, Aizawl Smart City a tawp hnai a, project chhuanawm tak tak an hawn mawlh mawlh thu a sawi a, "Tuna mi pawh hi project chhuanawm em em, kawng hrang hranga Mizorama a hmasa ber nihna hauh thei tur, hmunhma ṭha leh ṭangkai tak tur, changkang em em a ni. A bul hnaia awmte an vannei lehzual a, an lawmpuiawm," a ti.

Aizawl Smart City Ltd chu tàwp mai tur a nih tawh thu sawiin K Sapdanga chuan, "Project thar chhuanawm tak dang pakhat, Mizoram State Museum chu September chhunga hawn leh theih beisei a ni a, chu bak chu Aizawl Smart City a awm chhung chuan hawn tur kan nei tawh lo ang," a ti a; Aizawl Smart City Ltd chu sorkarin a ui tak zet a, a tàwp dawn tawh si avangin a thlakna tur an ngaihtuah thu a sawi.

UDPA Minister chuan, Aizawl Smart City thlaktu tur leh hmachhawpte chhunzawmtu tur Mizoram Urban Development Agency Ltd (MUDAL) an din thu a sawi a, "Thawktu tur la turin kan inbuatsaih mek a, September 2026 chhunga zawh hman tum a ni a, October aṭang chuan bung nghal thei tura beisei an ni. MUDAL hian Smart City hmachhawp project pawimawh leh chhuanawm tak tura beiseite an thawk chhunzawm dawn," a ti.

MUDAL chuan bawlhhlawh ṭawih thei lo sawngbawlna hmun tur Material Recovery Facility leh mi sang chuang eizawnna atana hman tur City Centre rei lo têah peih hman an tum dawn thu sawiin Minister chuan, "Hengte bakah hian khelmual pahnih leh motor parking turte an la chhunzawm dawn," a ti a; SASCI hnuaia project lian leh pawimawh, Aizawla ro tling tur paruk pawh MUDAL-in an enkawl dawn thu a sawi.

K Sapdanga chuan, Chaltlang Multipurpose Sports Complex aṭangin India rama champion bakah, a aia sang pawh an beisei dawn thu a sawi a, "Tunlaia kan buaipui em em drugs addict-te'n damna hmun atan hmang se, a sim tawhte tan hmun nuam ni se kan duh. A tak hmu lotu tan chuan awihawm loh khawpin Mizo ṭhalai drugs addict an tam. Hengte chhan chhuah leh a la ti lohte'n an tih lohna atan hmalak hi kan ngai pawimawh em em a ni," a ti.

Chaltlang Multipurpose Sports Complex hawnnaa khualzahawm Education minister Dr Vanlalthlana chuan, Sports Complex chu ṭangkai taka hman a nih theihna atan a hmang tur leh a neitute an pawimawh tih sawiin, "Mi tam takin thiamna an chhar chhuahna hmun a nih ngei kan beisei a, mi tam takin chhawr ṭangkai se kan duh," a ti a; Complex neitu DIET, SCERT leh Chaltlang mipuite chu ṭangkai taka hmang turin a chah.

Inkhawm hi UDPA secretary V Lalsangliana'n a kaihruai a, Aizawl Smart City chief executive officer CC Lalchhuangkima'n Chaltlang Multipurpose Sports Complex enkawltu tur Management Committee hnenah a hlan nghal. Management Committee-ah hian Chaltlang khawtlang hruaitu te, SCERT leh DIET hotute an tel a; Complex hi an inṭâwm tur a ni.

Multipurpose Sports Complex hi November 30, 2022-ah sak ṭan a ni a, August 20, 2026-ah sak zawh a ni. Basketball court, volleyball court, gym leh media room a awm a, a sir kualah mi 1,000 ṭhut theihna a awm. Mipui punkhawmna atana hman a nih dawna court-a phah tur ruahman nghal a ni. A hnuaiah boxing ring pakhat leh table tennis pahnih a awm a, mi 48 ṭhut theihnaa awm tel.

A hnuai ber leh a dawttuah khum 12 ve ve awmna mipa leh hmeichhia dormitory a awm a, inthiarna, dinning room leh choka a awm nghak. Generator 25KVA general dah a ni bawk.