Mizoramah ruihhlo a tlem tial tial; Assam lama ruihhlo zawng an pung

Working Committee on Ruihhlo Do chu an chairman Lalnghinglova Hmar, Excise & Narcotics minister hoin nimin khan Secretariat conference hall-ah an ṭhukhawm. Mizoramah ruihhlo a tlem sâwt avangin a man a sang a, Vairengte pêla ruih tur zawng an tam thu tarlan a ni.

Lalnghinglova Hmar chuan, sorkar department-te leh Central YMA report-a a lan danin, tun hnaiah Mizoramah heroin leh ruihna atana hman ṭhin khuh damdawi (codeine-based cough syrup) man a sang chak hle tih a sawi a, "Ruihhho a tawm-im hret hret niin a lang. Hetihlai hian, ruihhlo hi a awm ta lo a ni lo a, a mamawhtu pawh an la tam em em a, ruihhlo do leh a ti thar tur vên kawngah ṭan kan lak chhunzawm zel a ngai," a ti.

CYMA hruaitute tarlan danin, tun hnaiah Aizawl leh hmun dangah heroin a tlêm tâk avang leh, a man a sàn chak êm avangin Vairengte pêla ruih tur zawng Mizo ṭhalai Assam lama kal an pung nasa a; Excise & Narcotics leh Police ten an vil reng a ni.

Ṭhutkhawmah hian Kolasib SP leh Cachar SP te inbiain, ruihhlo donaah thawhhona ṭha neih a ṭul thu sawi a ni. Ruihhlo ti tur venna leh ti lo tura inzirtirna chu pawl, kohhran leh sorkar department hrang hrangin mahni zâwn ṭheuhah an vei ang zela an kalpui ṭhin chu ṭha viau mah se, kalphung mumal zawk leh auhla inanga tinzawn neia inzirtirna kalpui dan tur an rêl.

Food and Drugs Administration-in ruihna atana hman khuh damdawi chu dan hnuaia khuahkhirh tura hma an lakna ngaihthlak a ni a; Village Level Task Force on Ruihhlo Do chak zawka kalpui dan tur te, sikul naupangte hnena awareness neihnaa hriat tur pawimawh te, kohhran nena thawhhona ṭha a awm zel theih dan turte sawiho a ni bawk.

Working Committee on Ruihhlo Do hnuaiah hian sorkar department pasarih, tlawmngai pawl hrang hrang leh kohhran aiawhte an tel a ni.