School building chhiat chhan sawifiah

School Education minister Dr Vanlalthlana chuan Assembly fûr ṭhutkhawm zawh takah khan MNF member Dr R Lalthangliana zawhna ziaka chhangin, Mizoram puma sikul building chhiat chhan a sawifiah.

Dr Vanlalthlana chuan, school building ṭhenkhatte chu sakna rei deuh tawhte a nih thu a tarlang a, "Sikul ṭhenkhatte chu khawtlangina an din, a sakna atan pawh hmanraw remchang an hmuh ang ang hmang tea an sakte an ni hlawm. Mizoram hi tlang ram, ruahtui tlak tamna hmuna awm a nih avangin ruahsûr nasa avang te, enkawl zui ṭhat tawk loh vang te, leimin nasat avang leh in chung hul lo, etc. avangtein school building eng emaw zat chuan sak ṭhat leh repair an mamawh ṭhin hle," a ti.

Cement concrete (RCC) hmanga sikul building sakte pawhin uluk taka enkawla thawm ṭhat ṭhin an mamawh tih sawiin Minister chuan, "Repair ngaih huna repair zung zungna tur sum a awm ṭhin loh avang te, sikul chawlh laia school building-te enkawl zui loh leh thil dangah khawtlang lamte'n an hman cháng a awm ṭhin a, Mizote zingah public property-te mahni mimal building anga uluk taka enkawl an nih ṭhin loh avangin an tlabal hma deuh niin a lang," a ti a; hmanrua ṭhat tâwk loh vang te, hnathawh dan phung dik loh vangte leh sikul neitute'n an enkawl ṭhat tawk loh vangte pawh a nih theih thu a tarlang.

Education Minister tarlan danin, RCC hmanga sak sikulte chu a nih dan tur (specification) ang taka sak leh uluk taka enkawl zui a nih chuan kum 40-50 vel daih tura ngaih a ni. Mahse, Mizoramah ruahtui a tam a, ruah leh ní an do dai a, chuvang chuan a daih rei zawng a danglam thei ṭhin a ni.