Sawhthing support price atan sorkarin vbc 192.63 sêng tawh

ZPM kaihhruai sorkar chuan kum hnih chhung sawhthingah minimum support price a pe tawh a, support price atana a pek tawh zawng zawng chu cheng vbc 192.63 a ni.

August 25&27-a Assembly fûr ṭhutkhawmah MNF member K Laldawng-liana zawhna chhangin Agriculture minister PC Vanlalruata chuan, sorkarin sawhthing chingtute hnenah support price bat a neih hriat a nih loh thu a tarlang a, "August 3, 2026 khan sawhthing support price a pe chhuak kim tawh," a ti.

Agriculture Minister tarlan danin, sorkarin sawhthing support price a pek chhuah dan chu - kum 2025-ah cheng vbc 141.50 leh kum 2026-ah cheng vbc 51.13 a ni a; a vaiin cheng vbc 192.63 a ni.

Kum 2025-ah buffer stock point aṭanga sawhthing hralhna man sorkarin a dawn zat chu cheng vbc 12.78 a ni a; hei hi Mizoram sorkar account-ah August 18, 2025 khan challan hmangin thun a ni.

Secondary collection centre (SCC) hrang hrangin sawhthing an hralhna chu SCC account-ah a lut phawt a, chumi hnuah sawhthing hralhtu hnenah an pek leh ṭhin avangin sorkarin a dawng lo.