Edible Oil Processing Plant hawn a ni

Rashtriya Krishi Vikas Yojana - Detailed Project Report (RKVY-DPR) 2023-24 aṭangin Falkawnah Edible Oil Processing Plant din a ni a, nimin khan Agriculture & Farmers Welfare minister PC Vanlalruata’n a hawng a, khawl hnathawh dan enchhinna nghal a ni.

Edible Oil Processing Plant bunna tur in chu RKVY-DPR 2021-22 aṭanga sum hmangin sak a ni a, RKVY-DPR 2022-23 sum hmangin a hmunhma hung niin, tél (edible oil) herna khawl chu RKVY-DPR 2023-24 sum hmangin bun a ni thung.

Sorkar thuchhuah tarlan danin, Processing Plant hian hriak nei thlai rêng rêng a her thei vek a; khawl enkawl zui turin Agriculture department chuan Aizawl City Oilseed Growers and Processing Cooperative Society Ltd. an thlang a, nimin khan kum nga awh tur inremna thuthlung an ziak nghal.

Agriculture Minister chuan, sorkarin loneitute a ngai pawimawh tih sawiin, "Sawhthing, nihawichi, behliang, anṭam leh chhawhchhi chìnah hma kan la chho zel a, a hralhna tur pawh sorkarin a ngaihtuahpui zel a, farmer-te tan káwl a ên zel a ni," a ti.

Mizoramah hriak (oilseed) herna ṭha tak bun a ni ta chu kut hnathawktute hmasawn zelna tur a nih thu sawiin PC Vanlalruata chuan, "Processing industry hrang hrang rawn ding chho zel hian ram hmasawnna a la thlen zel dawn a, industry-te hi farmer-te tana innghahna tling, eizawnna thlentu a nih ngei ka beisei," a ti a; loneitute'n hma an sawn zel theih nan Agriculture department-in RKVY scheme aṭangin hma a lak zel dawn thu a sawi.

Edible Oil Processing Plant hawnna inkhawm hi Agriculture secretary Ram-dinliani'n a kaihruai. Plant enkawl tura thlan Aizawl City Oilseeds Growers and Processing Cooperative Society chairman Lallawmkima leh Agriculture director Vanramthangi ten kum 5 chhunga Plant enkawl zui turin thuthlung an ziak a ni.