Robert-a'n infiamna hmunhmate a tlawh

Sports & Youth Services minister Robert Romawia Royte chuan January 16, Inrinni khan Aizawla infiamna kaihhnawiha hmalakna hrang hrangte a tlawh.

Robert Romawia Royte chuan, Mizoramin a la neih ngai loh outdoor gym pahnih a nei thar dawn tih sawiin, "Outdoor gym hi khawvel hmun hrang hrang leh India khawpui lianahte an uar hle. Man chawi ngai loa a duh apiangin exercise an lâk theih nana siam a ni," a ti.

Infiamna chu Mizoram sorkarin industry-ah a dah thu sawiin Sports Minister chuan, "Mimalte pawhin sumdawn nan an hmang ṭan mek a, infiamna hmunhma buatsaihtute'n bank loan leh sorkar subsidy-te pawh an hmang ṭangkai thei ve tawh dawn a ni," a ti a; Mizo mipui zingah taksa insâwizawi ngaih pawimawhna a len chhoh avangin sorkarin a ngaihtuah zel tur thu a sawi bawk.

Outdoor gym set pakhat chu kum nga chhung warranty nen Rs. 60,00,000 zel a ni a, Arihant Industrial Corporation siam niin, an authorised dealer Mapuia Enterprise, Aizawlin pe chhuakin an rem khawm a, kum nga chhung a thlàwnin an enkawl zui dawn a ni.

Sports Minister hian Mualpuia Sports Hostel sak mek te, Upper Republic-a MSR Gym te, R Dengṭhuama Hall kawt leh New Capital Complex-a outdoor gym siam mek leh Chanmari Mini Sports Complex-te a tlawh a ni.