KHAWTHLIR

Rangkachak man

Assam Rifles leh Mizoram Police chuan August 24, 2026 khan Zuangtuia in pakhat an enfiahnaah rangkachak gram 82 (gold biscuit) an man a, Rs 13,06,000 hûa chhût a ni. Rangkachak kawltu Myanmar lam mi hmeichhia kum 41 an man nghal a, rangkachak leh a neitua puh hi Customs hnenah an hlan.

CADS ruihhlo man

Central YMA hnuaia ruihhlo donaa hma latu Central Anti Drug Squad chuan August 22-28, 2026 chhungin heroin gram 94.244 an man a, crystal meth gram 649, ganja gram 534 leh alprazolum mûm 321 an man bawk. Ruihhlo man kaihhnawihah hian mi 37 an man a, chu'ng zinga mi 29 chu counselling neihpui an ni.

Kut tin siam zir zote thlah

Mizoram Youth Commission chuan nimin khan MYC Auditorium-ah a thlawna kut tin siam leh enkawl zirna a buatsaih, 'Nail Technician Training' hnuaia zir chhuak mi 27-te thlahna hun an hmang a, MYC chairman Malsawmzuala Ralte-in a hmanpui. Training zote hnenah certificate bakah, eizawnna bul an ṭanna atan hmanraw chi hrang hrang pek a ni.

MP (RS) chawimawi

Saitual Joint Village Council chuan nimin khan Saitual College auditorium-ah an khaw chhuak K Laltluangkima, Rajya Sabha MP hnenah chawimawina an hlan a, bialtu MLA Prof. Lalnilawma'n a hmanpui. K Laltluangkima chuan, Saitual mipuite'n lawmpuina leh chawimawi an hlan chu a lawm thu a sawi a, Mizoram aiawh MP a nih avangin ṭawngṭaipui ṭhin turin Saitual mipui a ngen.

'Robâwm' tlangzarh

School Education minister Dr Vanlalthlana chuan nimin khan School Education Complex, Aizawlah Mizoram Education Inspecting Officers' Association lehkhabu buatsaih 'Robâwm' a tlangzarh. Minister chuan, lehkhabu chu School Education department leh zirna ngaihventu zawng zawng tan ro hlu tak a nih a beisei thu a sawi.