Aizawlah National Sports Day hman a ni

Sports & Youth Services (SYS) minister Lalnghinglova Hmar hoin nimin khan Sports Authority of India (SAI) Training Centre, Aizawlah National Sports Day hman a ni. Minister chuan, state dangte hnunga tàwi reng lo a, mite ruala hmasawn tum turin infiammite a chah.

Lalnghinglova Hmar chuan, National Sports Day chu Mizorama infiammite'n ṭan an lak thar ní ni se a duh thu sawiin, "National Games-ah leh India ram pum huap inelnaahte a hnudâla kan ṭang fo hi a ngaimawhawm. Sorkarin theihtawp a chhuah mek zel a, infrastructure ṭha kan mamawh rualin, kan neih ang angte hman ṭangkai a ṭul," a ti. Mite ruala hmasawn tum tur leh hmasawnna tura rawtna an neihte hotute hnena thlen zel turin infiammite a chah.

Inkhawm hi SYS director Henry C Lalrawnkima’n a kaihruai a; SAI Training Centre in-charge Elizabeth Lalnunmawii Colney kaihhruaiin kalkhawmte'n an taksa leh rilru hriselna ngai pawimawh tur leh infiamna chawisang a, infiamna lama tui tura mi dangte fuih tura intiamna thu an sawi rual.

National Sports Day hi infiammi ropui Maj. Dhyand Chand pian champha August 28-ah kum 2012 aṭang khan hman ṭhin a ni a; nimina Aizawla Day lawmnaah hian SYS department-a pisa hrang hranga thawkte tan inelna leh intihhlimna hun buatsaih a ni.