Sikul 3-a classroom sak thar hawng

Mizoram Bána Kaih (Handholding) scheme hnuaia Mizoram District Transformation Programme (MDTP) kaltlanga Lunglei district-a sikul pathum - Leitlangpui High School, Tlabung Middle School leh Lungsen Senior Secondary School (Samagra)-a classroom sak belh tharte chu August 27, Ningani khan Lunglei DC Navneet Mann-i'n a hawng.

Sikul pathuma classroom sak belhna atan hian Bána Kaih aṭangin Lunglei District Catalytic Fund-ah cheng nuai 15 dah a ni a; classroom pakhat sakna atan Rs 5,00,000 hman niin, kumin April 5 aṭanga August 5 chhungin sak zawh a ni.

Lunglei DC Navneet Mann chuan, Bána Kaih scheme chu kut hnathawktute leh sumdawnna leh eizawnna kawng hrang hranga hma thar latute dâwm kân nan hman a nih rualin, MDTP kaltlangin district tinah hmasawnna thar leh chhawr theih project tihhlawhtlin nan DC-te kutah sum dah a nih thu a sawi a, "Sum dah hmangin hmalak mek a ni. MDTP hnuaiah hian Lunglei district-ah department hrang hrang aṭanga rawtna lut project pakua zawh a ni tawh," a ti.