MZU-ah Career Guidance & Counselling

Mizoram Youth Commission (MYC) leh Mizoram University-a Department of Sociology chuan August 27, Ningani khan MZU School of Social Sciences multipurpose hall-ah 'Career Guidance and Counselling Programme' an buatsaih a, MYC chairman Malsawmzuala Ralte-in a hmanpui.

Malsawmzuala Ralte chuan, tum nei saa lehkha zir a ṭul thu sawiin, "Kan tum tak kan thleng ta lo a nih pawhin eng emawah tal hlawhtlin a awlsam bik. Sorkar hna hi hna ṭha leh ngêlnghet a nih rualin, thawh tuma exam ṭhinte zingah 10% vel bak an hlawhtling ngai lo a, skill base hna leh entrpreneurship lamah rilru neih a ṭha," a ti a; mahni kea din tum chu ṭhalai changkang zia a nih thu a sawi.

Inkhawm hi MZU Dept. of Sociology assistant professor Dr B Lalzarliana'n a kaihhruai a; NERD Montage co-founder Dr Lalhmangaihsanga Renthlei leh OSD to chief secretary Elijah LH Sanga ten thil pawimawhte an zirtir a ni.