CM hoin project ruahmante thlirho

Chief minister Lalduhoma hoin nimin khan CMO conference hall-ah PM-DevINE, NESIDS (Road), NESIDS (OTRI) leh North Eastern Council hmanga thawh tur project ruahmante thlirho a ni.

CM Lalduhoma chuan, central scheme hnuaia Mizoramin a chan tur zat hriat a la nih loh thu sawiin, "Kan allocation neih zat tur kan la hre lo deuh a, kan hriat veleha kan thawh nghal tur project neih lâwk a, kan ngaih pawimawh dan indawt siam sa a ṭul," a ni a; a ṭul angin project siam belh a la ṭul theih thu a sawi.

Ṭhutkhawmah hian Adviser to CM (finance) TBC Lalvenchhunga, MLA bakah, Planning leh Finance department hotu te, sorkar department dang hotute an tel a; PM-DevINE, NESIDS (Road), NESIDS (OTRI) leh NEC hmanga thawh tur project siamte inhrilhfiah a ni.