Selingah Cold Storage thar hawng

Rural Development & Administration minister Prof. Lalnilawma chuan nimin khan a bial chhunga Selingah MLA fund leh SELCO Foundation hmalak-naa din Cold Storage a hawng a; mi taimate'n leirem an rah theih nan sorkarin theihtawp a chhuah zel dawn thu a sawi.

Prof. Lalnilawma chuan, SELCO Foundation nen thawkhoin Selingah solar light leh fan an dah tawh thu a sawi a, "Sorkar chuan kut hnathawktute a ngai pawimawh a, mi taimate’n leirem an rah theih nan theihtawp a chhuah zel dawn," a ti. Seling chu Mizorama khaw pawimawh a nih thu sawiin, an hmanraw dawnte ṭangkai taka hmang zel turin duhsakna a hlan.

Cold storage hi metric ton 5 dawng niin, ni zung chakna (solar power) hmang a ni a; MLA fund Rs 4,52,000 leh SELCO Foundation sum Rs 6,70,000 sénga lei a ni.