Sakawrdai CHC lawmman lawmna hmanpui

School Education minister Lalchhandama Ralte chuan January 16, Inrinni khan Sakawrdai Community Health Centre (CHC)-in damdawi-in fai lawmman a lâk lawmna a hmanpui a, Sakawrdai VC House sak thar a hawng nghal.

Lalchhandama Ralte chuan, Sakawrdai CHC-in damdawi-in fai leh ṭha lawmman a la chu a lawmpui thu sawiin, "Damdawi-ina doctor leh thawktute in chhuanawm tak zet. Hmar khaw thimah Sakawrdai CHC hian ênna a keng a, he lawmman hian mipui thinlunga changkanna leh hmasawnna a pholang a ni," a ti.

Sakawrdai CHC hian Kayakalp hnuaia faina lama inelnaah kum 2019-20 khan pakhatna a dawng a; NHM Overall Performance Award (PHC/CHC/SDH) 2019-20-ah lawmman pakhatna, Best Performing CHC Under Reproductive & Child Health (RHC) leh National Vector Borne Disease Control Programme lawmman pahnihna, Overall Performance Award (Main Centre, Sakawrdai) lawmman pathumna an dawng a ni.

Sakawrdai damdawi-inah hian doctor pathum leh nurse pasarih an thawk a, khum 24 a awm a ni.