Living Museum mi 8,014-in an chhim
Art & Culture department-in Mizo Typical Village, Zokhua, Falkawna Living Museum an buatsaih ṭhin chu mi 8,014-in an chhim tawh.
Art & Culture department chhinchhiah chinah, Living Museum hi mi 8,014-in an tlawh tawh a, chungte chu state pawn lam mi khualzin 3,029 leh Mizoram mi 4,985 an ni.
Living Museum hi October 25, 2025 khan Art & Culture minister C Lalsawivunga'n a hawng a; tun aia changtlung zawka kalpui chhunzawm zel Art & Culture department chuan an tum.
Ṭhangthar leh naupang zawkte’n Mizo nun ze mawi leh chìn dan hrang hrangte a tak ngeia an hmuh leh tem theih nan te, zirlai naupangte tana ṭangkai tur leh an zirlaibua awmte an hriatthiam lehzual theih nan leh, khualzinte’n Mizo hnam nun an hmuh fiah theihna turin Live Museum hi buatsaih a ni ṭhin.
Living Museum hi Inrinni apiangin buatsaih ṭhin a ni a; luh man Rs 100 chawiin a chhim theih. Mizo hnam nunphung entir (show) chu hun hnihah ṭhen a ni a; first segment chu chhun dar 12 aṭang 1:30 inkarah neih ṭhin niin, second segment chu chawhnu dar 2 aṭanga dar 3:30 inkarah neih ṭhin a ni.
Show-ah hian hmanlaia Mizo nun dan leh an thil tih ṭhin chi hrang hrang te, hnam làm leh zai te, Mizo infiamna te, hnam thuam chi hrang hrang te, Mizo ei leh in (traditional cuisine) lamte entir ṭhin a ni.