Family pension mi 51-in an pe let tawh; Pek lêt theih hun vawiinah a tawp dawn

Mizoram sorkarin dan loa family pension late chu anmahni duh thua an document-te sorkarah pe lêt (surrender) tura a tihah August 18, 2026 thleng khan mi 51-in an pe lêt tawh. Pension document pek let hun hi vawiinah a tawp dawn a, hun tiam chhunga pe let lote chu ngaihdam an ni dawn lo.

Finance department-in office memorandum a tichhuaha a tarlan angin, hriat lohna avang emaw, chhan dang emaw vanga dan loa family pension late chu anmahni duh thua an pek let (voluntary surrender) hun atan July 1, 2026 aṭanga September 30, 2026 chhung hun hawn a ni.

Hun tiam chhunga mahni duh thua pension document pe lette chu ngaihdam an ni dawn a, pension sum an lo lak tawhte chhuhsak an ni dawn lo. Hun tiam chhunga pension document le pet lo hmuh chhuahte chu dan anga hrem tum a ni thung. Document dik lo pe chhuaktute lakah dan anga hmalak tum a ni bawk.

Dan loa family pension late hian CCS (Pension) Rules, 1972 behchhana Finance department-in office memorandum an tihchhuah an bawhchhia tih tarlan a ni.

DAN LOA FAMILY PENSION LATE
☑ Family pension la mekin nupui/pasal a neih leh chuan family pension a la thei tawh lo.
☑ Sorkar hnathawk fa hrin ni lo emaw, dan ang taka fa lak ni lo, birth certificate lem siama family pension la.
☑ Sorkar hnathawk ni chunga mahni nu/pa emaw, fate emaw family pension la.
☑ Pensioner ni reng chunga mahni nu/pa emaw, fate emaw family pension la.
☑ Thla khata sum lak luh zawng zawng belhkhawm a, monthly minimum pension Rs 8,700 + DR income nei pha te - tunah chuan Rs 12,702 la tlingte.