KHAWTHLIR

Thisen pe

August 29, Inrinni khan KṬP, Mission Veng Branch chuan an kohhran hall hulhliapah ZMCH tan thisen unit 96 an pe a, petute mipa 83 leh hmeichhia 13 an ni. KṬP, Chanmari West Chhimveng Branch-in an din champha pualin Civil Hospital, Aizawl tan unit 38 pein, petute mipa 33 leh hmeichhia panga an ni a; PYD, Lunglei Pûkpui Bial pawhin Lunglei Civil Hospital tan unit 37 pein, petute mipa 32 leh hmeichhia panga an ni. Mizo Higher Secondary School zirlai hmeichhia 17 leh mipa 15-te pawhin August 28, 2026 khan Civil Hospital, Aizawl tan thisen unit 32 an pe bawk.

Kawlphetha leina cheng vbc 1,620.24

Mizoram sorkar chuan April 2024 aṭanga August 18, 2026 thleng khan Mizoram pawn aṭanga kawlphetha leina atan cheng vbc 1,620.24 a sêng tawh.

CSS-ah thawktu mi 12,116 an awm

Department of Personnel and Administrative Reforms (DPAR) chhinchhiah danin, Mizoram sorkar hnuaiah centrally sponsored scheme (CSS) hnuaia thawk mi 12,116 an awm mek a; ZPM kaihhruai sorkar chhungin mi 32 dah ngheh tawh an ni.

Bawlhhlawm báwm khaw paliah sem

Serchhipa PHE executive engineer Isaac Lalchhuanmawia chuan tun hnai khan Solid Waste Management Rules, 2026 kalpui meka rural area pilot village atana thlan - Léng, Sailulâk, Sialsir leh Baktawng Tlangnuamah bawlhlawh chi lia thliarna tur báwm a sem. Bawlhhlawh thliar dan enkawlnaa mawhphurhna hi thingtlang lam chu PHE department kutah a awm a, khawpui lam chu UDPA department kutah a awm thung.

Kuhva rah man

Assam Rifles sipaite chuan an thu dawn bawhzuiin August 28, 2026 khan Champhai Zotlangah ram dang aṭanga dan loa lak luh nia hriat kuhva rah ip 437 (kg 32,890) an man a, Rs 3,44,68,720 hùa chhût a ni. Kuhva rah hi Champhaia Customs Preventive Force hnenah an hlan.