MUHCS 2.0-ah damlo 27,678 tan cheng nuai 6,536 pe chhuak tawh

Mizoram Universal Healthcare Scheme (MUHCS) 2.0 hnuaiah Mizoram sorkarin damlo 27,678 enkawlna senso cheng nuai 6,536 a pe chhuak tawh. Sorkar damdawi-in zingah Civil Hospital Aizawl, private hospital zingah Mizorajah Synod Hospital leh Mizoram pawnah Manipal Hospitals ten MUHCS zawmtu damlo an enkawl tam ber.

August 25 & 27, 2026-a Assembly session-a Health & Family Welfare minister Lalrinpuii'n MNF member Lalchhandama Ralte zawhna ziaka a chhan danin, MUHCS 2.0 kal mekah August 24, 2026 thleng khan MUHCS zawmtu damdawi-inte hnenah MUHCS hmangtu damlo an enkawlna senso atan sorkarin Rs 65,36,67,635 a pe a ni.

MUHCS 2.0-ah hian Mizorama sorkar damdawi-in 60 hnenah damlo bill 7,239 atan Rs 11,23,18,493 pek a ni tawh a; Civil Hospital, Aizawl chuan MUHCS hmangtu damlo enkawl tam berin, damlo bill 2,273 atan Rs 4,70,64,836 a dawng tawh.

Mizorama mimal/pawl (private) damdawi-in 23 hnenah damlo bill 18,981 atan Rs 42,50,35,463 pek a ni tawh. Sorkar damdawi-in ni lo zingah Mizoramah chuan Synod Hospital-in damlo bill dawng tam berin, mi 6,814 enkawlna man Rs 19,98,99,379 an dawng tawh a ni.

Mizoram páwna MUHCS empanelled hospital 25 hnenah damlo bill 1,458 tan Rs 22,86,32,171 pek a ni tawh. Manipal Hospital - Broadway, Kolkata chuan bill 266 atan Rs 3,61,03,478 dawngin, sum dawng tam ber a ni a, Manipal Hospital - EM Bypass, Kolkata chuan damlo bill 273 neiin, bill ngah ber a ni a, damlo 273 enkawlna atan Rs 3,53,72,672 an dawng tawh.