MLA-in mi 55 hnenah ṭanpuina a hlan

Aizawl South-II bialtu MLA Lalchhuanthanga chuan August 29, Inrinni khan Kulikawn YMA Hall-ah progress partner atana thlan mi 55 hnenah ṭanpuina sum a hlan.

Eizawnna bul ṭanna leh inṭanpuina atana Aizawl South-II chhunga sum hlante chu - pety trade (dawr)-ah mi 26, ranvulhah mi 17 leh thiamhnâng deh (handicraft)-ah mi 12 an ni a; Rs 50,000 ṭheuh pek an ni.

Lalchhuanthanga chuan, sum inhlanna chu bial danga an la tih ngai loh thil thar, an biala an tih chhin a nih thu sawiin, "Fel tawk lo leh duhthusam chiah lo a awm mai thei a, a ṭul anga changtlung zawka kalpui zel kan tum dawn. He progress partnership livelihood atan hian a thlangtute kan unit hruaitute an ni a, an hlawhtlinna tur kawngah mawhphurhna lian tak an nei dawn a ni," a ti.

A bial chhungah hmeithai leh upa lam khawsak harsa an tam tih sawiin Lalchhuanthanga chuan, "Engtin nge an eizawnna kawngah kan chhawmdawl ang tih hi kan ngaihtuah reng a, theihtawp kan chhuah zel dawn a ni," a ti a; sum an dawnte chu a nihna ang taka hmanga hlawhtlinpui ngei tur leh, Pathianin hun ṭha a pek chu ṭangkai tak leh hlawhtlin nana hman tum ngei ngei tur progress partner-te a chah.