Mission AIDS Suraksha hmalakna thlirho

Lunglei District AIDS Prevention & Control Committee chu an chairman Navneet Mann, bawrhsap kaihhruaiin August 28, 2026 khan an ṭhu a; Mission AIDS Suraksha (MAS) kalpui meka Lunglei district dinhmun thlirho a nih bakah, Intensified IEC Campaign 3.0 hmanga HIV/AIDS chungchang inzirtirna beihpui thlak dan tur an rel.

Ṭhutkhawma tarlan danin, MAS hnuaiah hian Lunglei district-ah July 2026 khan 95:95:99 target aṭangin 84:89:95 tihhlawhtlin a ni. MAS target tihlawhtling turin sorkar pisa, zirna-in leh khualzin phur lirthei khalhtute zingah HIV/AIDS chungchang inzirtirna leh endikna neih a ni a; Healthy Lunglei District Campaign-a hmalaknaah HIV endik tel a nih bakah, tlawmngai pawlte leh kohhrante nena thawhhona ruahman mek a ni.

Intensified IEC Campaign 3.0 hi Lunglei district-ah September-October 2026 chhungin kalpui tur a ni a; Lunglei district-a khaw 25-ah HIV/AIDS leh mipat hmeichhiatna aṭanga natna inkai chhâwn theih saihri (syphilis) chungchang inzirtirna leh thisen endik (HIV test) rûnpui neih a ni ang.

Lunglei Bawrhsap chuan, MAS kaltlanga HIV/AIDS veite'n an dinhmun an hriat chian a, enkawlna ṭha an dawn theihna tura hmalakna chu HIV/AIDS darh zel tur venna atan a pawimawh thu a sawi a; Lunglei district-a hlen chhuah tur target-te a hma thei ang bera hlen chhuah tum tur leh, Intensified IEC Campaign-ah theihtawp chhuah turin thawktute a chah.