Bawlhhlawh thliar dan tur hriattir

Khawzawl district bawrhsap K Vanlalṭhiana chuan thuchhuah siamin, Solid Waste Management Rules (SWMR) 2026-in a tarlan anga bawlhhlawh paih dan tur leh dan zâwm lote hrem theihnate a tarlang.

Khawzawl DC chuan, SWMR 2026-in a tarlan angin, a paihna hmun ni loa bawlhhlawh paih ṭhinna hmun, garbage vulnerable points (GVP) zawn chhuah leh chhinchhiahna (mapping) aṭangin Khawzawl district-ah GVP a awm tih hmuh chhuah a nih thu a tarlang a, "GVP-ahte hian bawlhhlawh paih khap a ni a, paih luite chu dan anga hrem theih an ni," a ti a; GVP-te zawn chhuah zel a, bawlhhlawh paih tawh lohna hmuna siam a ṭul thu a tarlang.

Bawrhsap chuan, SWMR 2026-in a sawi angin, bawlhhlawhte chu chi lia thliar tur a nih avangin dik taka thliar turin Khawzawl district mipui a chah a, "Ṭawih thei (wet waste)-te hi SBM(G) leh 15th Finance aṭanga siam compost pit (community & individual)-ahte paih ṭhin tur a ni a, PHE department-in compost pit-te hi hman ṭangkai a nih leh nih loh an endik zel dawn a ni," a ti.