MP (RS) leh MJA member-te an inkâwm; 'Party dang leh party nei lote MP pawh ka ni' - K Laltluangkima

Rajya Sabha MP K Laltluangkima chu nimin khan Aizawl Press Club-ah a leng a, MJA hruaitute leh member-te nen an inkâwm. MP chuan, ZPM ni lo party dang leh party nei lote MP pawh a nih tel thu a sawi.

K Laltluangkima chuan, Mizoram aiawh tura MP atana thlan a nih thu sawiin, "ZPM ngun thei ka ni lo a, party dang leh party nei lote MP pawh ka ni. MP-te'n office leh quarter an nei lo hi ṭha ka ti lo a, Chief Minister hnenah MP-te tan office pe tura dilna ka thlen tawh. Party dang tan ZPM office-a min dawr tura rawn kal a nuam lo thei a, in lama indawr a remchang lo thei. Chuvangin, MP hian office kan mamawh. Aizawl kher lo, khaw dang mi pawh MP an ni thei a, an la ni bawk anga, chu'ng atan pawh chuan MP quarters neih a ngai," a ti.

A duh tan chuan MP a nih ve mai mai theih a rin thu sawiin MP chuan, "Chutiang ni loa mahni state tana theihtawp chhuah tum tan chuan inzir chhoh char char a ngai. Theihtawp chhuahin kan inzir chho a, MP nih nuam ti hman pawh ka ni lo a, enjoy thei pawh ka ni lo," a ti a; ram tana rawng an bawl zelna turah MJA nen thawhhona ṭha tak an neih zel a beisei thu sawiin, MJA member-te chu finchhuah zel turin a sawm.

K Laltluangkima chuan, tun hma aṭangin ram tan eng nge a tih theih ang tiin nasa taka a lo ngaihtuah ve tawh ṭhin tawh thu leh, tuna Mizoramin a mamawh hmasa ber nia a hriat chu kawngpui ṭha neih a nih thu a sawi a, "Kawng piah lamah hian Mizote'n India ram leh khawvel hmun dangah zau zawka inpho chhuah tam kan mamawh. India rama hnam hrang hrang zingah Mizote kan danglam bikna (uniqueness) hi khualzin hîpna atan hman ṭangkai thiam a pawimawh a ni," a ti.

Rajya Sabha MP chuan, Mizoram chu kawng hrang hrangah state dang aiin a hnufual tih sawiin, "Hei hi a chhan chu an hnathawh phung (construction quality) a ṭhat tawk loh vang te, a enkawl zuina (maitenance) ṭhat tawk loh vangte a nih avangin hna ṭha a awm theihna tura hmalak chu tihmakmawh a ni," a ti a; ZPM kaihhruai sorkarin Mizorama hmasawnna hnathawh hrang hrang endiktu tur a din chu duhthusam ni lo mah se, thil ṭha tak a nih thu a sawi.

Mizoramin state danga mite hriat atana chanchin duhawm leh mawi tak tak an neih thu sawiin K Laltluangkima chuan, "Eirukna tlemna kan ni te, sorkar hnathawk aikal la kan titawp te, ziak leh chhiar thiam tamna kan ni te hi thil lawmawm tak a ni. Chanchin ngaihnawm lo tak pawh kan nei tho a, cancer tamna kan ni ringawtte chu thil ṭha lo tak a ni. Cancer thlen thei thil chi hrang hrangah hi chuan insum tlat i tum ang u," a ti.

Aizawl Press Club conference hall-a inkawmhona hi MJA president Vanlalrema Vantawl-in a kaihruai a, Rajya Sabha MP thar hnenah Nehru-coat hlanin a hâktir. MJA general secretary K Zothanpara'n inhmelhriattirna hun hmangin, MJA chanchin tlangpui a sawi a, MJA member-te'n thu an
sawi bawk.