KHAWTHLIR

Financial literacy

Aizawl Bawrhsap pisa leh Securities and Exchange Board of India (SEBI) chuan nimin khan IPR Auditorium-ah 'Awareness Programme on Financial Literacy and Retirement Planning' an buatsaih a, Aizawl additional DC Zoramsiama Hmar-in a hmanpui. Aizawl district-a head of office-te leh an hnuaia group A officer chin an tel a ni.

Marathon Race

Siaha DC office, District Nasha Mukt Bharat Abhiyaan Committee leh Mara Students Organisation te chuan August 29, 2026 khan National Sports Day pualin Marathon Race an huaihawt. Marathon-a telte chu Siaha SDC Z Lalnghaktluanga'n Meisavaih Forest Check Gate bul aṭangin a vailiam a, Siaha Bazar Traffic Point thleng an tlan a ni.

Ruihhlo do sawiho

Lunglei District Committee on Nasha Mukt Bharat Abhiyaan chu an chairman Navneet Mann, district bawrhsap kaihhruaiin nimin khan an ṭhukhawm. Annual District Action Plan an thlirho bakah, line department leh tlawmngai pawlte'n ruihhlo ṭhat lohzia inzirtirna kawnga hmalak dan tur rawtna an neihte September 20, 2026 ral hmaa thehluh ni se an ti.

Tihdikna

Nimin August 31, 2026-a chhuak Vanglaini phek 1-naa family pension chungchang caption (thupui)-ah, mahni duh thua pension pek let theih hun August 31, 2026-a tawp tur anga ziah chu tihsual palh a ni a, September 30, 2026-a tawp tur zawk a ni. A chhung thu-ah erawh chuan a dika ziah a ni thung. Tihsual palhah chhiartute hriatthiamna kan dil e.

Lunglei district-ah nau piang 1,581

Lunglei District Coordination Committee on Civil Registration System chu nimin khan district bawrhsap Navneet Mann hoin an ṭhukhawm. Kuminah Lunglei district-ah nau piang 1,581 leh mitthi 449 chhinchhiah a nih tawh thu tarlan a ni.

Nuai 22,790.11 hû ruihhlo man tawh

Saitual District Level Narco Co-ordination Centre Committee chu an chairperson Srinivas Sadi, bawrhsap hoin nimin khan an ṭhukhawm. Saitual police-te'n kumin 2026 chhungin ruihhlo Rs 2,27,90,11,950 hû an man tawh a, a kaihhnawihah mi 83 leh lirthei 40 an man tawh tih tarlan a ni.