Health Minister hoin Manipal Hospitals-a Mizo nurse-te thawh dan tur sawiho a ni

Health minister Lalrinpuii hoin nimin khan a pisaah Mizoram sorkar leh nursing school/college hotute leh Manipal Hospitals hotute'n nurse lak chungchanga hmalak dan tur an sawiho. Directorate of Nursing hnuaia Recruitment Cell hmalaknain Directorate of Nursing-ah walk-in interview neih nghal a ni.

Ṭhutkhawmah hian Manipal Hospitals hotute chuan, Mizoram aṭanga damlo tam zawk an enkawl theih nan hmalakna thar an neihte an tarlang a; damlo khum indaih lohna vanga khum 35 awmna Day Care Centre an hawn belhte chu Mizoram aṭanga damlote tan bika ruahman a nih thu an sawi.

Damlo enkawl kawnga tawnhriat (experience) nei Mizo nurse tam zawk an damdawi-ina thawk tura lak belh an duh thu Manipal Hospital hotute chuan an sawi bawk.

Ṭhutkhawmah hian Health & Family Welfare department hnuaia Directorate of Nursing hotute bakah, Synod Hospital College of Nursing, Mizoram College of Nursing, Blessino Nursing School leh Apollo School of Nursing hotute an tel.

Manipal Hospitals hian India ramah damdawi-in 49 an nei mek a, chu'ng zinga panga chuan MUHCS an zawm a ni.