Pawisa khawn DC-in a hriatpui lo

Lawngtlai bawrhsap Donny Lalruatsanga chuan nimin khan a pisaah thuthar thehdarhtute a kâwm a; Myanmar lama bungraw phurh luhah DC hriatpuia pawisa khawn a awm nia sawi chu thu belhchian dawn lo a nih thu a sawi.

Donny Lalruatsanga chuan, tun hnaiah social media-ah Lawngtlai paltlanga Myanmar-a bungrua phurtute nia ngaih theihin Lawngtlai DC hriatpuinaa pawisa khawn an awm ni an sawi chu a hriatpui loh thu a sawi a, "Lirtheia bungraw phur an ni emaw, thil dangah emaw pawh ni se, District Administration chuan chhiah lak theihna dan a nei lo. He inpuh mualphonaa mawhphurtute zawng chhuak a, an phû tâwk hremna pek an nih theih nan hmalak mek a ni," a ti.

Bungraw phurtute hnena pawisa khawn anga sawi chungchangah amah emaw, DC office emaw ten inhnamhnawihna an neih loh thu sawiin Bawrhsap chuan, "He inpuhna hi ka ngai thutak hle," a ti a; thil awm dan chhui chiang tura hmalakna kalpui mek a nih thu leh Lawngtlai police-te'n uluk taka an chhui mek thu a sawi.

Lawngtlai DC tarlan danin, social media-a video thehdarhah hian Myanmar-a scooter phur lut tur nia insawi, driver nia ngaih theih chuan Lawngtlai bulah an lirthei lo tiding a, pawisa chawitir an nih thu a sawi a; pawisa chawitirtute chuan an thil tih chu DC-in a hriatpui tih an sawi a ni.