MZP hnawk titute hi thil dik lo an tihte MZP-in a dodal ṭhin vang – MZP President

MZP chuan nimin khan Federal Council an nei a; MZP president C Lalremruata chuan thu sawiin, MZP hnawk titute chu thil dik lo an tihte MZP-in a dodal sak ṭhinte niin a sawi.

MZP Federal Council-ah hian September 23-25, 2026 chhunga Darlawna inkhawmpui an neih huna rêl atan agenda 11 an pawm a; zirlaite kaihhnawih thil paruk leh ram leh hnam kaihhnawih panga a ni.

C Lalremruata chuan, social media-ah MZP demna leh sawiselna a tam thu sawiin, MZP hnawk titute chu thil dik lo an tihte MZP-in an dodal ṭhin vang niin a sawi a, "MZP hian kum 90-na a hmang mek a, ram leh hnam tana a thawhna zawng zawng hre loin tun hnaiah social media-ah MZP an sawisel vak vak a, a pawi takzet. MZP sawisel ṭhintute hi an chhung leh khat sorkar hnaa dik lo taka lut emaw, eirûkna avanga MZP-in kan lo beih tawhte leh hnam dang sumdawnpui a, hlawkna lo têl vete an ni duh khawp mai," a ti.

MZP President chuan Electoral Roll Special Intensive Revision kalpui mekah SIR 2005 leh 2026 inkara Chakma punna chu zirchiangin, Election Commission of India-in final electoral roll a tihchhuah thlengin a enzui zel dawn thu a sawi bawk.

Agenda atana an pawm zingah, 'Zo fate kan inpumkhat lehzual theih nan sikul zirlaibuah Mizo hnam hrang hrangte chanchin telh a nih theih nan MZP-in hma la rawh se' tih te, 'The Mizo Marriage and Inheritance of Property (Amendment) Act, 2026' khauh taka ken kawh a, hnam dang thlahten Scheduled Tribe (ST) chanvo an chuh ve loh nan hmalak ni rawh se' tih te, 'Zirlaite'n ruihhlo hman sual a hlauhawmzia an hriat theih nan MZP-in nasa zawkin drugs awareness campaign buatsaih rawh se' tihte a tel a ni.