Lawngtlai district-ah raltlan leh ramdangmi in luahtir tawh loh rêl

Lawngtlai bawrhsap Donny Lalruatsanga kaihhruaiin nimin khan sorkar hotute, khawtlang hruaitute leh MJA aiawhte'n Lawngtlai district-a dan leh thupek kenkawh chungchang an sawiho a; Lawngtlai district-ah vawiin September 1 aṭangin raltlan leh ramdangmi te in luahtir phal tawh loh an rêl.

Ṭhutkhawmah hian Lawngtlai district-a ramdangmi (foreigner) lut leh chhuak khuahkhirhnaah khauh zawka hmalak an rêl a; September 1, 2026 aṭangin raltlan leh foreigner-te tan in luahtir phal tawh loh ni se, hemi atan hian a ṭul angin DC office lamin thuchhuah siam se, hotel leh homestay-ah pawh khauh zawka endikna kalpui ni se, an ti.

Lawngtlai district-ah dik lo taka certificate pek chhuah a awm tawh loh nan hmalak an rêl a; certificate dik lo siama pe chhuak ṭhinte man chhuah a, dan anga hrem ni se, DC office leh Central YLA ten lo bawhzui se, an ti.

Chak zawka ruihhlo do a nih theih nan leh, thil sual titute leh pawikhawihtute dan anga hrem an nih theih nan Police leh YLA ten theihtawp chhuah se, an ti a; lirtheia chetsualna leh intihpalhna a tlem theih nan September thla chu 'No Tolerance Month' atana puan an rel bawk.