Ukilte pualin dan zirhona buatsaih

Aizawl District Legal Services Authority chuan nimin khan Aizawl District Court conference hall-ah ukilte leh a kaihhawiha thawktute pualin 'Awareness & Training Programme' an buatsaih.

Zirhonaah hian Aizawl DLSA secretary Lalhriatpuii, civil judge (Senior Division) leh J Thankima College-a assistant professor Dr Lalbuatsaiha ten thupui thlan bik hmangin kalkhawmte an zirtir a ni.

Lalhriatpuii chuan, hna thawhna hmunah dimdawi taka ṭawngkam hmang ṭhin turin ukilte leh court-a thawktute chahin, "Court-a kal hleihlenna tuartu emaw, a titu emawte lakah pawh ṭawngkam mawi zawk hman a ṭul a, hleihlenna tuartute chu court chhungah tawrh nawntir loh tur a ni," a ti a; The Sexual Harassment of Women at Workplace Act, 2013 chungchanga hriat tur pawimawhte a hrilhfiah.

Dr Lalbuatsaiha chuan, Rights of Person with Disabilities Act, 2016 hnuaia India rama rualbanlote humhalhna chungchang sawifiahin, rualbanlote'n mi dang ang thoin zirna, eizawnna leh thil dang hrang hrangah hamṭhatna an neih thu a sawi a; danhremite'n rualbanlote an puih theih dante a sawifiah bawk.