Rengte Tlangsang lei minna enfiah

Kolasib bawrhsap H Dolianbuaia chuan August 30, Pathianni khan Kolasib daia Rengte Tlangsanga leiminna hmun a enfiah a, sorkar official dangte leh NHIDCL hotute leh kawng siamtu contractor-te'n an ṭawiawm.

Bawrhsap chuan, tunlaiah ruahtui a tlak nasat avangin mipui leh lirthei khalh ṭhinte fimkhur a ṭul thu sawiin, kawng siam leh enkawl hna thawk mektu NHIDCL leh an contractor-te pawh leimin leh chhiatna thleng thei laka inring reng turin a chah a, "Kawng chhiat vang emaw, leimin vang emawa lirthei chet velnaah khuahkhirhna siam a ngai a nih chuan a hma theih ang berin DC leh Police lam hriattir ṭhin tur a ni," a ti.

Lirthei khalhtu zingah kawng siamtute ruahmanna zâwm lo an awm ṭhin tih tarlan a ni a; NHIDCL-in lirthei tlan dan tur an ruahmante chu ṭha taka zâwm turin Bawrhsap chuan mi tin a ngen a ni.