Kohhran inpumkhatna kawnga Hmalaknaah MTA-te an lawm

Mizo Theological Association (MTA) chuan thuchhuah siamin, Mizorama kohhran hrang hrangte’n kumin chhûnga inpumkhatna leh thawhhona kawnga hma an lâknate chu lawmawm an tih thu leh, kohhran hruaitute fakawm an tih thu an tarlang.

MTA chuan, Evan-gelical Church of Maraland (ECM)-in Mizoram Presbyterian Kohhran leh Baptist Church of Mizoram (BCM)-te inkhawmpuia inpalai tawn leh tura an ngen te, BCM-in Synod-a inpalai tawn leh a duh thu a thlen Synod-in pawm a, an inpalai tawn leh tate chu lawmawm an tih thu sawiin, "Kum 30 chuang inpalai tawnna tihtawp a nih hnuah Synod 2016-ah BCM-in palai pahnih a tír leh thei ta hi Mizo kohhran inpumkhatna leh thawhhona atan rahbi thar pawimawh tak niin kan hria," an ti.

Mizoram Synod-in Mizoram kohhran hrang hrangte inpumkhatna leh thawhhona atana Synod Executive Committee ruahmanna a pawm leh, hmun tam thei ang bera sawihona leh in-rawnkhawmna neih te, inpumkhatna leh thawh-hona kawnga hma la tura kohhran dangte sàwm leh a kawng tur sawipui a tumte chu Mizote tana Pathian thil tum tihhlawhtlinna kawngpui pawimawhah an ngaih thu MTA chuan an tarlang.

MTA chuan, kohhran pawl tinte chu an kohhran huang chhungah ṭheuh kohhran inpumkhat leh thawhho pawimawhzia inzirtír tur leh kawng dap turin an ngen bawk.