Ṭhalaite tan kan thawk zel ang - Hawla

Chief minister Lal Thanhawla chuan, a kaihruai sorkar chuan ṭhalaite hmasawnna tura ke an pen zel tur thu a sawi a, Sairang Dinthar Venga Mizoram Football Association (MFA) khel-muala FIFA-in artificial turf an phahna hmu tur pawh sorkarin a chei tur thu a sawi.

December 16 zana Lammuala Mizoram Premier League final ṭan hmaah thu sawiin Chief Minister chuan, khelmual cheina tur sorkarin a pawm tawh thu a sawi a, Mizo ṭhalaite taksa leh thlarau nun thlenga chhanchhuak tura ṭan an lakna kawng khat a nih thu a sawi.

MPL final ṭan hma hian Tata Trusts, Mizoram sorkar leh MFA-in football zirna Centre of Excellence an dinna tura inremna thu puan a ni a. Tata Trusts aiawha thusawitu Burzis Taraporevala, Secretary & Chief Accountant, Tata Trusts chuan India hmarchhak naupangte tana football zirna changtlung tak an din tur thu leh, chumi atana Mizoram sorkar leh MFA inhawnnaah lawmthu a sawi.

Football zirna ṭha Centre of Excellence hi Rajiv Gandhi Stadium behchhana kalpui tur a ni a, Tata Trusts leh U Dream lamin a buaipuina sum an tum dawn a ni.

Centre of Excellence hnuaiah hian naupangte chu a ṭha thei ang bera training pek an ni ang. Naupang awm zinga a tiṭhate chu scholarship pein Germany-ah a thlawna training tura tirh ṭhin an ni dawn a ni.

RG Stadium beh-chhana Centre of Exce-llence din turah hian naupang 20 dah phawt an ni dawn a, football mai bakah zirna lamah pawh ṭha thei ang bera enkawl an ni ang.

Tata Trusts hi Mizo-ram sorkar nen pawh an thawkho mek a, thawhho-na hnuaiah hian SSA leh MFA ṭangkawp buatsaihin naupang 3000 chuang footbal zirtir mek an ni a, senso ṭul ang angte chu Tata Trust hian an tum a ni.