KHAWTHLIR

Thisen pe

Inrinni khan Zemabawk North Branch YMA-in Aizawl Civil Hospital tan thisen unit 41 an pe a, a petute mipa 33 leh hmeichhia pariat an ni. ṬKP Serkawn bial-in Christian Hospital, Serkawn tan unit 36 an pe a, a petute mipa 27 leh hmeichhia pakua an ni a; Rangvamual Branch KṬP-in Synod Hospital tan unit 14 pein, a petute mipa 13 leh hmeichhia pakhat an ni.

Kawng hawng

Cheng nuai 39 chuang senga siam, Electric Veng thlanmual panna kawng chu Inrinni khan bialtu MLA Lal Thanzara'n a hawng. Lok Sabha MP fund, bialtu MLA fund bakah PWD leh Social Welfare dept. sum hmanga siam niin, metres 110 a thui a ni.

Thilpek hlan

Siaha Officers' Club-te chuan Inrinni khan Siaha khawpui chhunga chhungkaw harsa zual 10 leh district jail, hospital pahnih leh orphanage home panhnih hnenah Krismas thilpek Rs. 4000 ṭheuh an hlan.

NLUP sawiho

Lunglei District Level NLUP Implementing Committee chu December 16 khan DC Lalzarmawii hoin DC conference hall-ah an ṭhukhawm a, December 14, 2016-a NLUP Implementing Board (NIB) thurel bawhzui dan turte an sawiho.

IMA hruaitu

Indian Medical Association (IMA), Mizoram State Branch-in December 15, 2016-a Aijal Club-a Annual Conference an hmannaah kum 2017-18 chhunga hruaitu tur an thlang a; president-ah Dr Vanlalruata, honorary secretary-ah Dr John Zohmingthanga leh mi dangte an thlang. IMA hian charity dinner an buatsaiha sum an hmuh aṭangin Myanmar-a Mizo tlawmngai pawl 'Zawlbuk' ṭanpui nan Rs. 1,00,000 an pe.

Lui humhalh

Ngentiang Branch YMA chuan Tuichang lui, Khawbel chhuah lí aṭanga Lungpuisaisir inkarah luia nungchate an humhalh thu an puang a; luia nungchate chu eng hmanrua maha man an phal lo tih sawiin, thupek zâwm lo chungah na taka action an lak tur thu an puang.