Congress leh MNF-te thu inchuh chhuitu AMC Fact Finding Team-in la chhui zo lo

Aizawl Municipal Cor-poration (AMC)-a Fact Finding Team chuan, kum 2015-a AMC inthlan hmaa RTI Act hmanga zawhna chhan dan chungchang chu thla 12 an chhui tawh a, an la chhui zo lo. Hetih lai hian, thil chhuina report chu hriattirna chhuah aṭanga thla hnih chhunga thehlut tura tih a ni thung.

Kum 2015 tawp lama AMC inthlan hmain AMC-in RTI Act hmanga zawhna a chhannaah, hna thawhna atana sum hman dan a pek chhuah chungchangah political party pahnih Congress party leh MNF-te chu an inpuh tawn a; a hnuah RTI zawhna chhannaa document pek chhuah dan chhui turin Fact Finding Team din a ni.

Fact Finding Team-te hna-thawh dan leh an report chu RTI Act hmangin AMC-ah dil a ni a; chhannaa a lan danin, AMC commissioner Dr H Lalthlangliana chuan December 7, 2015-ah Fact Finding Team a din a, member pathum ruat a ni. Team-ah hian AMC Secretary chu chairperson a ni a, AMC Su-peritendent leh System Adminis-tration-te chu member an ni.

AMC Commissioner-in notification a chhuahah hian Fact Finding Team chu kum 2012-15 chhunga AMC-in tender chhuah loa hna a thawh, RTI Act hmanga zawhna chhannaa tarlan chungchang chhui tura din a nih thu te, kum 2012-15 inkara work order pek chhuahte chu a taka thawh leh tihpuitlin a ni em tih te, work order pek chhuahte chu a takah thawh leh tihpuitlin a nih leh nih lohte chhui tura tih a ni.

RTI zawhna chhannaah hnathawh hming tarlan, work order pek chhuah si loh nia sawi chungchang te, original work order leh RTI chhannaa hnathawhna senso inmil lo a awm a nih chuan chhui chian tur a nih thute tarlan a ni bawk. Chhuina report chu pek chhuah aṭanga thla hnih chhungin AMC Commisioner-ah thehlut tura hriattir an ni.

Thla hnih chhungin an report thehlut tura hriattir ni mah se, Fact Finding Team chuan thla 12 a ral hnuah pawh an la thehlut thei lo. Hemi chungchang zawhna AMC SPIO-in a chhan danin, 'Fact finding Team-te thil chhui tur hi a tamin a hautak hle a. Tunah hian an la chhui zo thei lo a, document leh record
ṭhahnem tak en fel vel a ngai a. Tihsual awm lo thei ang ber tura chhuiin a hmunahte verification an nei ṭhin. Amaherawhchu, hna thawktu (contractor) biak pawh hleih theih loh an awm vang te, local council lam remchan lohna vang leh office lamah hna dang tam tak a awm avangin vawiin thlengin report an la siam thei lo a ni," tih a ni.

SPIO chuan, Fact Finding Team din a nih aṭangin Terms and Conditions siam sa angin hna an thawh ṭan nghal thu leh tun dinhmunah la chhui mek zel avangin information kimchang pek chhuah a la remchang lo niin a tarlang.

Kum 2015 khan AMC term hmasa hnathawh chungchang chu RTI Act hmangin mi
ṭhenkhatin information an dil chhuak a; hnathawh anga tarlan si, a tak hmuh tur awm lo te, hnathawh tarlan zingah pawh pawisa nena inmil lo tam tak a awm bakah, thil dik lo tam tak a awm nia sawi a ni.

Hei vang hian MNF party chuan document an neihte tlangzarhin, AMC-a Congress party kaihhruaia AMC sorkar a din laia work order pek chhuah leh hnathawh tawh anga tarlan si, a taka hnathawh hmuh tur awm lo eng emaw zat a awm thute an lo sawi tawh. Congress party lam chuan RTI Act hmanga zawhna chhannaah thil dik tawk lo a awm nia ngaiin, appellate authority-ah complaint an lo thehlut ve bawk.