Gorkhali-in khawmpui an hmang

Mizoram Gorkha Youth Association (MGYA) chuan December 16 khan Synod Mission Development Training Centre Hall, Bualpuiah khawmpui an hmang a, parliamentary secretary (Sports & Youth) Hmingdailova Khiangte-in a hman pui.

Hmingdailova Khiangte chuan con-ference tluang tak leh hlim taka hmang turin duhsakna a hlan a, Gorkha ṭhalai zinga mi hmingṭha pathumte tana chawi-mawina an siam chu a hlan nghal a ni.

Hmingdailova Khiangte chu khawmpui thlengtu MGYA Bualpui Branch ṭanpuina atan MLA fund aṭangin cheng nuai 1 a pek tur thu a sawi a ni.

Thusawitu dang MGYA president Netralal Jais chuan Mizorama Gorkha awmten YMA anga inzawmkhawm chu ṭhaa kan hriat avangin kum 1976 khan din ṭan a nih thu sawiin, "YMA zulzuia din a nih avangin a kalphung pawh YMA nen danglamna a awm lem lo," a ti.

Netralal Jais sawi danin, UDPA hmalakna avangin Sairang-ah Mitthi halna - Crematorium siam mek a ni a, nakkum January thlaah chuan hman theih tura peih hman beisei a ni.

MGYA hnuaiah hian sub-headquarters pakhat awmin, branch hrang hrang 16 an nei mek a; member 3476 an awm a, khawmpuiah hian Mizoram hmun hrang hrang aṭangin palai 200 chuang an tel a ni.